June-ah HIV kai mi 113 hmu chhuak

News: July 27, 2010 :Kumin June thla chhung khan HIV hrik pai hmuhchhuah thar mi 113 an awm a, HIV/AIDS avanga thi erawh an awm lo. June thla thlenga Mizoram puma thisen endik tawh zawng zawng chu mi 1,12,438 niin, chung zinga 4,721 chu HIV hrik pai an ni a, AIDS vei mi 462 leh AIDS vanga thi mi 171 an awm.
Mizoram State Aids Control Society chhinchhiah danin, kumin June thla chhung khan mi 3,277-te thisen endik a ni a, chung zinga mi 113 chuan HIV an vei tih hmuhchhuah a ni a; mi 113 zinga mi 76 chu mipat hmeichhiatna atanga HIV hrik kai an ni a, inchiuna hriau atanga kai mi 32, nu atanga kai naute pahnih leh, kai chhan hre lo mi pathum an awm bawk.
June thlaa HIV hrik pai hmuhchhuahte hi mipa 70 leh hmeichhia 43 an ni a; an zinga mi 49 chu kum 25 leh 34 inkar an ni a, kum 35-49 inkar mi 34, kum 15-24 inkar mi 28 leh kum 14 hnuai lam chu mi pahnih an ni.

source: vanglaini.org

Views: Mizoramah pawh HIV hrik pai kan lo tam ve ta hle mai a. HIV hrik darh tam chhan ber hi mipat hmeichhiatna hman khawloh atangin ani a, tunhma deuh kha chuan hriau thianghlim lo inhman tawm leh Drug Addict te atang khan ani thin a. Mahse tunah chuan hmel fai leh fel tak te tan pawh kai mai theih ani tih a hriat theih awm e.
Ram alo changkang zela , Mizo te pawh ramdangah kan khawsa nasa ve ta a, hetah hian nawhchizuar leh hnamdang kan hriatchian lem loh kawp hreh loh te pawh kan awm ve zel a, hei hian nasa takin HIV hrik hi a tidarh bawk. Kan chhehvel State kan thlir chuan Mizoram ai chuan AIDS vei pawh an tam viau zawk ani, a chhan pakhat ni thei bawk chu keini Mizo te aiin ram pawna awm an thlalai te an tam zawk te pawh atih theih awm e. AIDS dona atan hian mitin te hian tih theih kan neih vek tih hria ila, i fimkhur leh zual ang u.

Post your comments/ views here